Bajalan kaki bantuak baruak, ndak mamakai tarompa, taraso bana apo nan tapijak dek talapak kaki. Kok duri taraso padiah, kok lunau taraso lunak, kok batu taraso runciang, kok cirik ayam taraso gacah. Jikok dipakai tarompa japang, dek karano alehnyo indak tipih bana dan indak pulo taba bana, masih bisa juo diraso-raso nan tapijak dek kaki kok kareh saraso kalereng, lunak saraso paraweh busuak, atau tajam saraso kawek baduri. Tapi kalau taba bana tapak sapatu, samakin jauah jarak talapak kaki jo tanah, samakin ndak taraso beda antaro batu karekel jo kaki urang. Langkah diraso masih mahantak ka tanah, kironyo jari kaki urang lain nan tapijak an.‎‎

“Itu bana nan tajadi ka den tangah hari kapatang,” kecek Cimporong ka kawannyo. “Den sadang baranti di lampu merah Koto nan Ampek mambaok becak, dek kaki kida den taraso piradan makonyo den luruih an sabanta. Baru se den unjua an, pas pulo ado oto jip nan bajalan lambek-lambek di sabalah kida den tu bana. Digiliangnyo salayang ujuang kalingkiang den. Walaupun hanyo ujuangnyo se, bangkak juo jari nan ciek tu dek nyo kini,” kecek Cimporong mancaliak an ka kawannyo.‎‎

“Tu lai wa ang pacaruik an se paja tu?” Tanyo kawannyo. Langsuang dijawek dek Cimporong, “Baa pulo den ka bacaruik pungkang, mangecek se den payah dek manahan sakik. Tapi nan mambuek den muak, katiko lampu alah hijau, dek mancaliak den manahan sakik dibae nyo galak-galak ketek. Mungkin disangkonyo muko den merah dek manahan sasak tacirik. Ndak sadar paja tu kalau roda oto inyo nan manggiliang ujuang jari den.”‎‎

“Yo lah udi bana ang mah. Tapi, babaliak ka carito tadi, apo nan wa ang kecek an tu babeda jo nan den kecek an tadi. Nan den kecek an soal tapak sapatu, wa ang bacarito soal roda oto,” lanjuik kawan Cimporong.‎‎

“Samo se tu nyo!” baleh Cimporong.‎‎

Manuruik Cimporong, tapak sapatu jo roda oto tu samo-samo taba dan kaduonyo samo-samo mambuek urang nan mamakai ndak bisa marasoan kalau ado kaki urang lain nan tapijak atau tagiliang.‎‎

Itu makonyo, lanjuik Cimporong, kalau bajalan tu jan hanyo caliak-caliak langkah, tapi kana-kana juo tapak sapatu nan dipakai tu. Ndak sado urang mamakai sapatu nan samo jo awak do. Jan rancak sapatu se nan dicaliak, maha harago se nan dipalagak an, cubolah ditimbang-timbang juo sakik kaki urang lain ka tapijak dek awak.‎‎

“Patuiklah yo, urang nan mamakai sapatu nan tapak taba tu suko manyipak urang lain sajadi-jadinyo,” kecek kawan Cimporong manyolo.‎‎

“Dima pulo nampak dek an?” Tanyo Cimporong.‎‎

“Ado di Tipi den caliak kapatang. Antah ado apo, urang rami-rami demo kalau ndak salah. Tu datang urang-urang nan mamakai sapatu tinggi batapak bana. Nyo dongkak se rusuak urang-urang nan bademo tu. Tasanda buruak paja nan kanai dongkak tu sakali,” jawek kawan Cimporong.‎‎

“Kalau nan saroman itu pernah pulo den caliak langsuang. Den sadang manjua tutuik galon di pasa Ibuah, tibo urang-urang nan mararah. Disuruahnyo kami bakirok karano keceknyo lapak galeh kami ndak sesuai aturan. Alun salasai den mangamehi barang-barang den lai, nyo sipak jo sapatunyo nan taba tapak tu, baserak pulo baliak galeh nan sadang den kamehi tu!” carito Cimporong.‎‎

“Apa akal kita lagi?” Salo kawannyo.‎‎

“Ndak dapek aka dek den kini lai do. Den cubo pulo mangambangan lapak di tampek nan lain lai. Ma tau di situ aturannyo lai ndak main sipak se,” lanjuik Cimporong.‎

Tagalak-galak kawan Cimporong mandanganyo. Sajak bilo ado aturan nan bantuak itu. Saluruah aturan di negara ko dibuek dek urang nan alah tabiaso bajalan jo sapatu nan taba tapak, bukan urang nan mamakai tarompah japang atau nan ndak ba aleh kaki bantuak awak-awak ko. Indak ka taraso bagai dek urang tu kalau aturan nan mereka buek mamijak urang lain atau indak, nan penting dek urang-urang tu baa badannyo bisa tagak dima-dima.‎‎

“Kalau baitu, rancak baruak se nan maurus negara ko lai. Tapak kaki baruak masih bisa mambedakan ma nan kapalo urang dan ma nan karambia mudo!” Jawek Cimporong jo suaro tinggi.

‎‎Priiiiiiiiiiit! Tibo pulo urang-urang nan sadang dicaritoan.‎‎Langsuang tabang-hambua Cimporong jo kawannyo tu sakali mambaok galehnyo.‎‎

“Den ndak sato-sato do….” Bisiak kawannyo sambia manyuruak di baliak garobak cindua.